Los Talleres de Llectura n’Asturianu de la Comarca de la Sidra proponen cinco obres

Nava y Villaviciosa, les dos poblaciones qu’acueyen los Talleres de Llectura n’Asturianu de la Comarca de la Sidra, van entamar nel trimestre últimu del añu seis alcuentros con autores de los cinco títulos que se proponen pa esta seronda. El primeru va tener llugar mañana a les 19 hores na sala Marta Portal de la Casa Cultura de Nava, cita na que va tar presente Ruma Barbero pa falar del so cómic ‘Seltegu’, XI Premiu Alfonso Iglesias de cómic, correspondiente al 2019, dibuxante que va repetir en Villaviciosa, na Casa de los Hevia, el 25 d’ochobre.

Read Full Post »

La 44 Selmana de les Lletres Asturianes va rindir homenaxe al poeta y críticu lliterariu Xosé Bolado

La 44 Selmana de les Lletres Asturianes, que va celebrase ente’l 28 d’abril y el 6 de mayu, va rindir homenaxe a la figura del poeta y críticu lliterariu Xosé Bolado, fallecíu en mayu del 2021. Xosé Bolado, académicu de la llingua asturiana y profesor, ye una figura central de la recuperación llingüística y lliteraria d’Asturies na Transición. La programación incluye la estrena del documental Na firida del cementu. Vida y obra de Xosé Bolado, dirixíu por Ana Lamela, y tamién la edición de dos llibros conmemorativos alredor de la contribución decisiva que la figura de Xosé Bolado supunxo pa la llingua y la lliteratura asturianes.

Asina, Xosé Bolado. Fálame duce recueye la semblanza que distintos amigos y personalidaes del mundu de la cultura tracen sobre l’autor uviedín, no personal y tamién na aportación que fizo como poeta, como militante sindical y políticu y na so dimensión de críticu y estudiosu de la llingua y de la lliteratura n’asturianu. La obra, coordinada por Marta Mori, edítala’l Gobiernu del Principáu d’Asturies con realización editorial de Trabe.

Read Full Post »

La llingua asturiana yá tien los sos primeros “olímpicos”

ILLÁN GARCÍA

Finalistes de Secundaria: Álvaro Ordóñez, Vidal Quidiello, Lucía Doce, Xulia Antuña, Alberto Antuña, Favila Velasco, Naiara Suárez, Nerea Menéndez y Carla Bote.

La llingua asturiana tien falantes, escritores, académicos y, dende va delles selmanes, tamién “olímpicos”. Son estudiantes de Primaria, Secundaria y Bachilleratu que participaron nel primer concursu de redaición que lleva’l nome de Urbano Rodríguez, académicu de la llingua, que morrió en marzu de 2022. La Olimpiada escolar axuntó alumnáu de dellos centros asturianos, que pasaren delles prebes enantes de la gran final, na sede de l’Academia de la Llingua Asturiana, na cai del Águila d’Uviéu. Ehí, Xulia Antuña Ezama, del IES Santa Bárbara de Llángreu, algamó’l primer premiu na categoría de Secundaria y Bachilleratu. El navetu Favila Velasco Benavides, del IES Peñamayor, foi segundu. En Primaria, el primer premiu quedó n’Uviéu y foi pa la escolina Daniela González Villota, del colexu públicu de San Cloyo, y el segundu viaxó pa Bimenes, pa Gadea Iglesias Coto, del colexu de Martimporra.

Cada categoría tenía la so dificultá. Si na de Secundaria los participantes de la final teníen qu’escribir sobre alimentación, nutrición y costumes de vida saludable, y con un testu nel qu’apaecieran les pallabres “tán” y “tan”, amás de “xinta”, “sicasí” y “dafechu” y un neutru de materia, los de Primaria habíen cuntar una hestoria basada nunes viñetes na que teníen que nomase un día de la semana, les negaciones “non” y “nun” y les pallabres “suañu”, “portiella” y “molín”.

Con eses blimes, los “olímpicos” afondaron nel so maxín y armaron testos bien afayadizos. Los ganadores recoyeron los sos premios el pasáu 21 d’avientu, el mesmu día que l’Academia de la Llingua Asturiana entregó los sos obres premiaes del certame d’investigación, como’l de recoyida de material toponímico oral, que foi pa Xabiel Fernández y Lena Valladares; el de propuestes de terminoloxía especializada, que ganó Víctor Suárez; el de recoyida de material lliterario inédito, a Adrián Martínez; el de recoyida, trescripción y estudiu de testos orales, que recibió Claudia Elena Menéndez, y el de documentalismu sociocultural curtiu, que llevó Pablo Cueto. Y dende esi día l’asturianu tien tamién “olímpicos”.

(de La Nueva España, 31-01-2023)

Read Full Post »

Un circuitu de teatru zarra la programación del añu de Política Llingüística

La Dirección Xeneral de Política Llingüística del Gobiernu d’Asturies remata la programación del añu con un circuitu de cuatro funciones teatrales espardíes per tol territoriu con entrada llibre y gratuita.

Les funciones son les ganadores del Premiu de Teatru Nel Amaro, qu’entama la Conseyería de Cultura, Política Llingüística y Turismu, y van poder vese en Siero, Bimenes, Navia y Pravia.

Read Full Post »

L’ALLA comunica los ganadores de los sos concursos del Certame d’Investigación

Yá se conocen tamién los finalistes de la Olimpiada Escolar de Redaición Urbano Rodríguez que se celebra’l día 21.

Ocho años depués l’Academia de la Llingua Asturiana (ALLA) tornó a convocar los sos concursos. Per un llau tán los del Certame d’Investigación y, per otru, los destinaos a escolines y escolinos.

Los diferentes xuraos convocaos pola institución académica decidieron conceder el Xosé Bolado de recoyida de material lliterario inédito anterior a 1970 a Adrián Martínez Expósito por ‘Nel corazu de casina (1932-1934) de Fernán Coronas’; el de Documentalismu Sociocultural Curtiu a Pablo Cueto pa ‘Indianos d’azucre’; y el de Recoyida, Trescripción y Estudiu de Testos Oralespa Claudia Elena Menéndez Fernández por ‘Averamientu a la caracterización del asturianu de La Güeria Carrocera (Samartín del Rei Aurelio)’, que tamién recibe un premiu especial.

Read Full Post »

La promoción del asturianu mantiénse nel 0,04% del total del presupuestu

La partida pa promoción del asturianu recoyida nel proyectu de presupuestos pa 2023 xube a 2.535.701 euros, lo que supón –al igual que nes cuentes del 2019, 2020 y 2021– el 0,04% del total.

Nos presupuestos vixentes la promoción del asturianu tenía una partida de 2.205.441 euros, polo que la política llingüística pal 2023 xube en 330.260 euros. Sicasí, al producise una medría xeneral del presupuestu autonómicu, la partida continúa representando’l 0,04% del total de les cuentes.

Read Full Post »

El discu del concursu ‘Al son del cantar’, un recursu nuevu pa la clase de Llingua Asturiana y Gallego-asturiano

Les maestres y maestros de Llingua Asturiana y Gallego-asturiano disponen d’un recursu nuevu pa trabayar nes aules col alumnáu. Yá ta disponible en plataformas dixitales y va distribuyise de manera física per toles escueles del país el discu coles diez canciones de ‘Al son del cantar’, concursu que ta acabante de celebrar la so gala.

Destináu a escolines y escolinos de cuartu de Primaria a segundu de la ESO, esta iniciativa buscaba estimular el deprendimientu significativu del alumnáu per aciu de la investigación, el descubrimientu y la creatividá nel campu de la música. Nel aula habríen de componer una lletra pa un cantar a partir d’una melodía tradicional o orixinal pa valoración del xuráu encargáu de facer la escoyeta de los diez meyores pa la grabación del discu por parte de bandes o artistes con trayeutoria.

Read Full Post »

Ribeseya y Cecea, xuntos per carta

ILLÁN GARCÍA

Nel mundu d’internet, les persones comuníquense per corréu ellectrónicu, peles redes sociales emplegando l’ordenador o’l teléfono móvil. Poques persones manden cartes y la reciella que nació nesti sieglu muncho menos. Esa yá vieya comunicación ente persones ye un exerciciu que malapenes se trabaya nel aula, y too porque les nueves tecnoloxíes nun dexen furacos. Nestos tiempos de pandemia, les relaciones sociales tamién sofrieron y qué meyor que curiales magar que seya na distancia. Con eses blimes, la maestra d’asturianu del colexu Manuel Fernández Juncos, de Ribeseya, Jessica Rodríguez Corripio, propunxo a l’alumnáu de Sextu la posibilidá de cartease con escolinos de la escuela de Cecea (Nava). Ye más, unos conocerán la vida urbana y otros, la rural. Y yá unviaron la primer riestra de cartes. El miércoles pasáu, la maestra metióles nun buzón con destín a Nava. Al empar, Marta Martínez Fernández, tamién profe de Llingua Asturiana en Cecea, fexo lo mesmo colos sos escolinos. “Nestos tiempos, los neños nun salíen del pueblu y solo taben ente ellos, baxen a Nava pero poco, asina que buscamos la manera de tar en contautu con otros neños que viven otres realidaes”, espón la profesora naveta. Dambes maestres compartieron colexu nel cursu 2019-2020 cuando la primera ponía Asturianu y la segunda, Educación Física, nel Cra (Colexu rural agrupáu) “La Coroña”, onde ta encuadráu el centru de Cecea.

Read Full Post »

Cultura va repartir 60.000 folletos y 2.000 carteles col vocabulariu sidreru

El Gobiernu d’Asturies llanzó la campaña ‘La sidra, como siempre se dixo’, una iniciativa que pretende dar a conocer ente la ciudadanía’l vocabulariu específicu vinculáu a la cultura sidrera, caracterizáu por términos y espresiones n’asturianu.

Según informó’l Gobiernu asturianu, el proyectu forma parte de les acciones de promoción y defensa de la cultura sidrera, que ye candidata a convertise en patrimoniu inmaterial de la Unesco.
La conseyera de Cultura, Política Llingüística y Turismu, Berta Piñán, y el director xeneral de Política Llingüística, Antón García, presentaron la iniciativa nel Muséu de la Sidra de Nava.

Read Full Post »

La Rede de Normalización Llingüística falla los cantares ganadores del concursu escolar ‘Al son del cantar’

El proyectu ‘Al son del cantar’ yá tien ganadores de la edición 2021/2022. Nesta convocatoria participaron centros educativos de primaria y secundaria de los conceyos de Cuaña, Navia, Grandas de Salime, Xixón, Cangas del Narcea, Grau, Nava, Sariegu, Ḷḷena, Gozón, Carreño y Castrillón, convocaos polos Servicios de Normalización Llingüística de los conceyos mentaos.

Trátase d’un proyectu en forma de concursu musical pa los cursos de cuartu, quintu y sestu de Primaria y primeru y segundu de la ESO, que quier estimular l’aprendizaxe del alumnáu al traviés de la investigación, el descubrimientu y la creatividá nel campu de la música.

Read Full Post »