La Tertulia Malory escueye ‘Tiempu d’escoria’, de Xosé Nel Riesgo, como meyor llibru n’asturianu del añu 2022

La Tertulia Malory, de L’Entregu, escoyó como meyor llibru n’asturianu de tolos que s’editaron nel 2022 la novela Tiempu d’escoria, del escritor Xosé Nel Riesgo. El xuráu formáronlu los escritores Xulio Arbesú, José Luis Rendueles, Solinca Turbón, Roberto Corte, Aique Fernandi, Beatriz Quintana Coro, David Fernán, Chechu García y Henrique G. Facuriella, que fallaron el premiu nun actu celebráu na tertulia’l sábadu 18 de payares de 2023.

El xuráu destacó, nel acta del fallu, cómo «dende los güeyos d’un neñu y con una narrativa mui áxil, l’autor constrúi un testimoniu, en forma de crónica, de la vida nes barriaes del Avilés industrial de los años setenta del sieglu XX, al empar que ye quien a emocionanos col procuru y fondura colos que recuerda la figura materna»; el xuráu tamién quixo rescamplar la gran calidá de la producción lliteraria n’asturianu del añu 2022, lo que fixo que la decisión de premiar la novela de Xosé Nel Riesgo se garrara por mayoría depués d’una votación bien encesa.

Read Full Post »

Sotrondio y L’Entregu reciben la Xira pola Oficialidá

PABLO R. GUARDADO

Samartín del Rei Aurelio acueye esta selmana cinco díes d’actividá en llingua asturiana pa concienciar sobre la necesidá del reconocimientu llegal de les llingües d’Asturies. La Xira pola Oficialidá, que va reconocer a los primeros docentes que punxeron nel 1984 la materia de Llingua Asturiana y Lliteratura, prográmales en Sotrondio y L’Entregu hasta’l vienres, cuando Xulio Arbesú va protagonizar un pieslle musical.

La Fundación Almastur y Iniciativa pol Asturianu son los impulsores d’esta cita cultural qu’arrancó n’abril en Bimenes y que tien la pretensión de percorrer el país, Madrid y otros territorios con llingua propia. Villaviciosa ta prevista que sía, del 6 al 10 de payares, la tercer parada de la Xira pola Oficialidá, que s’entama gracies a la collaboración de los conceyos.

Read Full Post »

Cauce analiza la literatura en asturiano en el valle del Nalón

D. O.

La Asociación Cauce del Nalón se adentra en el otoño y continúa con su programa de actividades. Esta semana, el viernes 29, no estarán en la Casa de la Buelga, en Ciaño, sino en Casa de Cultura de El Entrego (San Martín del Rey Aurelio), con la mesa redonda “Lliteratura n’asturiano nel Valle del Nalón” en la que participarán los escritores Solinca Turbón, Beatriz Quintana, Chechu García, Xulio Arbesú y Miguel Allende.

En la cita, a las 20.00 horas, los escritores hablarán de su obra y de lo que se está haciendo ahora, en cuanto a literatura en asturiano, en la cuenca del Nalón. También analizarán la salud de la literatura en asturiano y su proyección en el futuro.

(de La Nueva España, 26-09-2023)

Read Full Post »

La 44 Selmana de les Lletres Asturianes va rindir homenaxe al poeta y críticu lliterariu Xosé Bolado

La 44 Selmana de les Lletres Asturianes, que va celebrase ente’l 28 d’abril y el 6 de mayu, va rindir homenaxe a la figura del poeta y críticu lliterariu Xosé Bolado, fallecíu en mayu del 2021. Xosé Bolado, académicu de la llingua asturiana y profesor, ye una figura central de la recuperación llingüística y lliteraria d’Asturies na Transición. La programación incluye la estrena del documental Na firida del cementu. Vida y obra de Xosé Bolado, dirixíu por Ana Lamela, y tamién la edición de dos llibros conmemorativos alredor de la contribución decisiva que la figura de Xosé Bolado supunxo pa la llingua y la lliteratura asturianes.

Asina, Xosé Bolado. Fálame duce recueye la semblanza que distintos amigos y personalidaes del mundu de la cultura tracen sobre l’autor uviedín, no personal y tamién na aportación que fizo como poeta, como militante sindical y políticu y na so dimensión de críticu y estudiosu de la llingua y de la lliteratura n’asturianu. La obra, coordinada por Marta Mori, edítala’l Gobiernu del Principáu d’Asturies con realización editorial de Trabe.

Read Full Post »

Cultura trabaya nun corrector ortográficu al asturianu y nun traductor al gallego-asturianu

La Conseyería de Cultura, Política Llingüística y Turismu va poner en marcha nel 2023 la versión actualizada del traductor castellanu-asturianu Eslema.2, que va poder usase dende los teléfonos móviles. Amás, van principiar a trabayar nun corrector ortográficu automáticu y va siguir trabayándose nel traductor al gallego-asturianu, d’esta vuelta dende dientro de la propia Dirección Xeneral.

Otra manera, nel 2023 va ponese en marcha’l premiu ‘Pachín de Melás’ de testos teatrales y va dase un impulsu a los estudios de llinguaxe alministrativu n’asturianu y a les publicaciones en gallego-asturianu, al menguar la edición de llibros nesti idioma nos últimos años.

Read Full Post »

L’ALLA comunica los ganadores de los sos concursos del Certame d’Investigación

Yá se conocen tamién los finalistes de la Olimpiada Escolar de Redaición Urbano Rodríguez que se celebra’l día 21.

Ocho años depués l’Academia de la Llingua Asturiana (ALLA) tornó a convocar los sos concursos. Per un llau tán los del Certame d’Investigación y, per otru, los destinaos a escolines y escolinos.

Los diferentes xuraos convocaos pola institución académica decidieron conceder el Xosé Bolado de recoyida de material lliterario inédito anterior a 1970 a Adrián Martínez Expósito por ‘Nel corazu de casina (1932-1934) de Fernán Coronas’; el de Documentalismu Sociocultural Curtiu a Pablo Cueto pa ‘Indianos d’azucre’; y el de Recoyida, Trescripción y Estudiu de Testos Oralespa Claudia Elena Menéndez Fernández por ‘Averamientu a la caracterización del asturianu de La Güeria Carrocera (Samartín del Rei Aurelio)’, que tamién recibe un premiu especial.

Read Full Post »

La promoción del asturianu mantiénse nel 0,04% del total del presupuestu

La partida pa promoción del asturianu recoyida nel proyectu de presupuestos pa 2023 xube a 2.535.701 euros, lo que supón –al igual que nes cuentes del 2019, 2020 y 2021– el 0,04% del total.

Nos presupuestos vixentes la promoción del asturianu tenía una partida de 2.205.441 euros, polo que la política llingüística pal 2023 xube en 330.260 euros. Sicasí, al producise una medría xeneral del presupuestu autonómicu, la partida continúa representando’l 0,04% del total de les cuentes.

Read Full Post »

Severino Antuña doctórase cola so tesis n’asturianu sobre la toponimia de La Güeria

El pasáu xueves 21 de xunetu celebróse na Facultá de Filosofía y Lletres de la Universidá d’Uviéu la llectura y defensa de la tesis doctoral presentada por Severino Antuña González, titulada «Documentación histórica de la toponimia de La Güeria Carrocera (Asturies)». La tesis, redactada en llingua asturiana y dirixida por Ramón d’Andrés Díaz, llogró la calificación de Sobresaliente Cum Laude.

El tribunal tevo formáu polos siguientes doctores: José Ramón Morala Rodríguez, de la Universidá de Lleón; Taresa Fernández Lorences, de la Universidá d’Uviéu; Xulio Viejo Fernández, de la Universidá d’Uviéu; Maria Pilar Perea Sabater, de la Universidá de Barcelona; y Sara Gómez Seibane, de la Universidá de La Rioja.

Read Full Post »

Cultura va producir el discu colos cantares ganadores del concursu escolar ‘Al son del cantar’

La Conseyería de Cultura, Política Llingüística y Turismu del Gobiernu asturianu va entamar la gala y va producir el discu colos cantares ganadores del concursu escolar ‘Al son del cantar’, entamáu pola Rede de Normalización Llingüística y con unes bases que puen consultase na web Educastur.Esti proyectu d’innovación educativa ta dirixíu a los centros d’Avilés, Candamu, Cangas, Castrillón, Corvera, Grau, Samartín del Rei Aurelio, L.lena, Xixón y a los conceyos de les mancomunidaes de la Comarca de la Sidra, Ozcos-Eo, Cabu Peñes y Parque Históricu del Navia.

Read Full Post »

Percorríu poles lletres asturianes n’ochobre con Asturies, Cultura en Rede

El programa Asturies, Cultura en Rede ufierta un percorríu poles lletres asturianes con un ampliu programa d’actividaes de los circuitos de lliteratura y Autores nel Camín pal mes d’ochobre. Asturies, Cultura en Rede ye un proyectu de la Conseyería de Cultura, Política Llingüística y Turismu, realizáu en collaboración colos conceyos asturianos y xestionáu pola Sociedá Pública de Xestión y Promoción Turística y Cultural del Principáu d’Asturies, que tamién incluye circuitos temáticos d’artes escéniques, Xacobéu, artes visuales, música y cultura tradicional por distintos conceyos del Principáu.

17 actividaes en 13 conceyos conformen la programación del circuitu de lliteratura pal mes viniente. Tras la Puerta Títeres va llevar Cuentos de casa a Castrillón, Gozón y Noreña; El Arca de Mozart, Operación Zanahorias, a Mieres, y ¿A qué suenan los libros? a Cuaña; Carlos Alba Cellero, La Caja Mágica, a Ribeseya; Elisabet Martín Teatro, Descubriendo a Gloria Fuertes, a La Ribera; y Producciones Viesqueswood, Asturias: voces femeninas de nuestra historia, a Tinéu. Va haber un alcuentru lliterariu con Xaime Martínez en Llangréu y va esponese en Gozón el poemariu ilustráu Una mitología. Seres y mitos del norte con alcuentru colos sos autores, Aurelio González Ovies y Toño Velasco, incluyíu. Storytellers va actuar en Cangas; El Velcro, en Llangréu; y Puppys, en Cuaña y Llaviana. Tamién van realizase los talleres Palabras como llaves, de Musa Cafeína, en Grau y La Ribera, y El sombrero que voló ¡Ilústralo tú! con Pintar-Pintar Editorial en Villaviciosa.

Read Full Post »