Cultura trabaya nun corrector ortográficu al asturianu y nun traductor al gallego-asturianu

La Conseyería de Cultura, Política Llingüística y Turismu va poner en marcha nel 2023 la versión actualizada del traductor castellanu-asturianu Eslema.2, que va poder usase dende los teléfonos móviles. Amás, van principiar a trabayar nun corrector ortográficu automáticu y va siguir trabayándose nel traductor al gallego-asturianu, d’esta vuelta dende dientro de la propia Dirección Xeneral.

Otra manera, nel 2023 va ponese en marcha’l premiu ‘Pachín de Melás’ de testos teatrales y va dase un impulsu a los estudios de llinguaxe alministrativu n’asturianu y a les publicaciones en gallego-asturianu, al menguar la edición de llibros nesti idioma nos últimos años.

Read Full Post »

La promoción del asturianu mantiénse nel 0,04% del total del presupuestu

La partida pa promoción del asturianu recoyida nel proyectu de presupuestos pa 2023 xube a 2.535.701 euros, lo que supón –al igual que nes cuentes del 2019, 2020 y 2021– el 0,04% del total.

Nos presupuestos vixentes la promoción del asturianu tenía una partida de 2.205.441 euros, polo que la política llingüística pal 2023 xube en 330.260 euros. Sicasí, al producise una medría xeneral del presupuestu autonómicu, la partida continúa representando’l 0,04% del total de les cuentes.

Read Full Post »

El 89,91 por cientu de los escolinos de la pública na cuenca’l Nalón va a Llingua Asturiana

PABLO R. GUARDADO

La matriculación na materia en Llingua Asturiana y Lliteratura na cuenca’l Nalón algama’l 89,91 por cientu nos centros públicos de Primaria, cuando la media nel país ye del 50,05. Nel Caudal destaca la cifra d’Ayer, con un 94,95 por cientu nos sos siete centros.

Los conceyos de les dos cuenques son los que más porcentaxe d’escolines y escolinos rexistra, anque tamién hai una demanda grande de la materia en sitios como Bimenes (87,04 por cientu), Candamu (92,86), Les Regueres (90,63), Muros (88,24), Onís (94,59), Sariegu (94,44) y, nel casu del gallego-asturiano, Santalla d’Ozcos (94,29). Nel Nalón atopamos a Casu, col 100 por cien, mentes que Samartín del Rei Aurelio llega al 92,68 por cientu, Llaviana al 89,85 por cientu y Llangréu al 77,10 por cientu.

Pa la del Caudal, Ayer cuenta col 94,95 por cientu de los alumnos de Primaria dando clase d’asturianu, cantidá que ye del 88,20 por cientu en Mieres, del 87,72 por cientu en Ḷḷena y del 83,72 por cientu en Riosa. Namái en Morcín y La Ribera hai un porcentaxe baxu, del 46,08 y del 33,33 por cientu, de manera respeutiva.

(d’Asturies.com, 20-06-2019)

Read Full Post »

Arranquen les primeres agrupaciones llocales d’Iniciativa pol Asturianu

La creación d’agrupaciones llocales foi una de les decisiones tomaes por Iniciativa pol Asturianu na Xunta Xeneral d’Asociaos celebrada nel 2017, cola fin d’ameyorar la so presencia nos conceyos. Xixón, Uviéu y la cuenca’l Nalón anunciáronse como les trés primeres que diben ponese a funcionar, tando yá en marcha les dos últimes.

Asina, la selmana pasada celebráronse reuniones pa trabayar sobre l’idioma nestos conceyos y afitar les bases d’estes agrupaciones. Nel casu de l’agrupación de Xixón, la previsión ye la de facer el primer axuntamientu ensiguida.

Read Full Post »

Iniciativa pol Asturianu crea agrupaciones locales n’Uviéu, Xixón y la Cuenca’l Nalón

Iniciativa pol Asturianu va a crear una rede d’agrupaciones nos distintos conceyos d’Asturies, que va arrancar n’Uviéu, Xixón y la Cuenca’l Nalón. Asina lo decidieron los socios de la entidá na so Xunta Anual d’Asociaos, celebrada esti sábadu pasáu pa tratar los proyectos a desarrollar nun añu que califiquen como “fundamental”. Amás, afirmen que quieren afitar y afondar nel trabayu desarrolláu con empreses y políticos “de toles estayes y sensiblidaes” y pal 2018 esperen medrar el númberu de socios.

Al traviés d’una nota de prensa, Iniciativa informó de la puesta en marcha d’estes agrupaciones locales, “asina como d’estremaos planes de trabayu qu’averen a la sociedá asturiana la situación del idioma y apoyen el marcu nuevu nel que ta l’idioma depués de los cambios qu’asocedieron esti añu y que ponen la oficialidá más cerca que nunca”.

Read Full Post »

Paquita Suárez Coalla protagonizó’l pieslle de les XXXVI Xornaes Internacionales d’Estudiu

Paquita Suárez Coalla protagonizó’l pieslle de les XXXVI Xornaes Internacionales d’Estudiu cola ponencia cola qu’averó a los participantes a la obra d’Antón García y cola conferencia que sobre’l so llibru “La mio vida ye una novela» ufrió la profesora Marta Fernández Morales.

L’Academia de la Llingua Asturiana peslló ayeri día 9, nel salón d’actos del edificiu alministrativu (1ª planta) de la Facultá de Filosofía y Lletres de la Universidá d’Uviéu, les XXXVI Xornaes Internacionales d’Estudiu, que vinieron desenvolviéndose dende’l martes día 7.

Read Full Post »

L’Alla desenvuelve esti Payares les XXXVI Xornaes d’Estudiu

L’Academia de la Llingua Asturiana vieno acabante d’asoleyar esti dia’l programa de les Xornaes que va organizar como tolos años del 7 al 9 del mes de Payares na Facuáltá de Filosofia y Lletres del campus delán Milán.

Les XXXIV Xornaes Internacionales d’Estudiu van celebrase como cada añu sedrá nel salón d’actos de la Facultá de Filosofía y Lletres y la inauguración va tener llugar el martes 7 a les 12 hores cola presentación de dos espublizaciones de l’Academia de la Llingua Asturiana, la edición dixital del “Lletres Asturianes 117” y el nuevu númberu de la revista dixital “Ciencies. Cartafueyos de Ciencia y Teunoloxía 7”, dixirida por Carlos Lastra.

Tres de la presentación entamarán les xornaes propiamente diches cola participación del académicu Francisco Llera Ramo (Universidá del País Vascu) que va facer la presentación en sociedá de la III Encuesta Sociolingüística de Asturias.

Read Full Post »

El Muséu del Pueblu d’Asturies cuelga l’Atles Sonoru de la Llingua Asturiana” n’internet.

Los cinco volumes del Atles Sonoru de la Llingua Asturiana”, editaos pol Muséu del Pueblu d’Asturies-Rede de Museos Etnográficos d’Asturies ente 2003 y 2010, tán yá accesibles on line na páxina web de la Rede de Museos Etnográficos d’Asturies (www.redmeda.com). Los 63 documentos sonoros editaos reproducen con calidá dixital les distintes modalidaes llingüístiques d’Asturies (oriental, central y occidental) por aciu relatos narraos de viva voz por falantes naturales de cada zona.

Pa facilitar l’audición y comprensión d’estos relatos, cada documentu sonoru va acompañáu de la so correspondiente trescripción testual. La so consulta ye llibre y gratuita nesti enllaz.

Read Full Post »

L’ALLA premia a dellos autores por trabayos de recoyida de toponimia

Aconceyáu’l Xuráu del Concursu d’Investigación de Recoyida de material toponímico oral, que convoca l’Academia de la Llingua Asturiana correspondiente al añu 2012 apautóse en premiar el trabayu tituláu Toponimia de la parroquia de Proaza. Conceyu de Proaza, del que son autores Antonio Alonso de la Torre y Francisca Iglesias Álvarez. El Xuráu taba formáu por Ana María Cano González como presidenta, Xosé Lluis García Arias como vocal y Alfonso Martín Caso faciendo de secretariu.

Dientro d’esta estaya, concediéronse tamién un primer accésit al trabayu Toponimia de la parroquia de L’Arteosa (Piloña), d’Aurina González Nieda y Jerónimo González Cueto, y dos segundos accésits correspondientes a los trabayos Toponimia de les parroquies de Riañu (Llangréu) y La Pasera (Noreña), de Xabiel Fernández García, y al estudiu La parroquia casina de Caliao. Material toponímico de la totalidá d’esta collación de Xulio Llaneza Fernández.

Read Full Post »

N’ast felicita a los cargos electos que xuraron n’asturianu nes investidures

L’asociación pro llingua N’ast, unvió una nota de prensa al traviés de la que quixo felicitar “a tolos cargos políticos eleutos qu’a lo llargo d’estos díes tomaron posesión de los sos escaños y conceyalíes utilizando la llingua asturiana”. Un fechu que consideren “d’especial importancia” pues camienten que “la necesaria rexeneración democrática y moral que rique’l nuesu País nun ye realizable ensin la plena normalización social de la llingua del pueblu asturianu”.

Read Full Post »