II Simposiu Internacional Aspectos Llingüísticos del Noroeste Ibéricu

Los díes 17 y 18 de payares d’anguaño, celébrase’l II Simposiu Internacional Aspectos Llingüísticos del Noroeste Ibéricu (SIALNI), na Facultá de Filosofía y Lletres de la Universidá d’Uviéu. A lo llargo de 5 sesiones, van desarrollase 22 comunicaciones y conferencies sobre llingüística, llingua y sociedá, llingüística histórica y léxicu y fraseoloxía del asturlleonés y del gallegoportugués.

Organicen el Departamentu de Filoloxía Clásica y Románica, el Departamentu de Filoloxía Española y el grupu d’investigación Seminariu de Filoloxía Asturiana.

Les sesiones celébrense nes Sales de Xuntes de los dos Departamentos.

ENLLAZ: II Simposiu Internacional Aspectos Llingüísticos del Noroeste Ibéricu.

(del Seminariu de Filoloxía Asturiana, 14-11-2022)

Read Full Post »

Yá ta disponible’l númberu 127 de la revista Lletres Asturianes

Nesti númberu espublícense ocho artículos venceyaos a cuestiones llingüístiques, abarcando fonética, música, lliteratura, torna ya incluso apuntes sobro llingua y cine

La investigación sobro lliteratura ocupa bona parte de la revista; asina, Adrián Expósito fae un averamientu  a la obra inédita del Padre Galo, Víctor Suárez Piñero estudia la presencia de l’asturianu en “Sinfonía Pastoral” y la so adautación cinematográfica y Hector García Gil apurre notes sobre la torna de “Retornu a Tagen Ata”.

Non tolos artículos tan escritos n’asturianu, Manuel Duarte João Pires apurre un trabayu d’investigación alrodiu’l mirandés escritu nesa llingua y Isabel Álvarez Sancho utiliza l’inglés pa falar de nueva tradición y activismu musical.

Llingüísticamente interesante abulta tamién el trabayu conxuntu de Natalia Riego Arredondas y Carmen Siñeriz Rico, alrodiu los avances fechos na creación del Diccionario Normativo d’Eonaviego.

Pa finar, nel separtáu de reseñer bibliográfiques alcontramos los artículos de Covadonga Martínez Sánchez , que fae un averamientu a los trabayos de fonética en 22 llingües d’Antonio Pamiés Bertrán, y de Xaime Martínez Menéndez, que fae una reseña bibliográfica del trabayu “Sound, Syntax and Contact in the Languages of Asturias, Amsterdam / Philadelphia”.

ENLLAZ: Lletres Asturianes, 127.

(d’InfoAsturies, 04-11-2022)

Read Full Post »

Les XL Xornaes Internacionales d’Estudiu yá tienen abierta la inscripción

Les Xornaes Internacionales d’Estudiu de l’Academia de la Llingua Asturiana algamen les cuarenta ediciones esti mes de payares de 2022. La Facultá de Filosofía y Lletres de la Universidá d’Uviéu acueye tres xornaes d’actividaes académiques, ente los díes 8 y 10, con ponencies, comunicaciones y presentaciones que, en xunto, ufierten una güeyada amplia de l’asturianística que se fai dende fuera d’Asturies.

De les ocho ponencies programaes, siete son obra de profesores n’universidaes norteamericanes y una vien dende una universidá británica: Sonia Barnes (Marquette University), María Turrero y Andie Faber (Drew University), Miriam Villazón (University of California), Eduardo García (University of Massachusetts Amherst), Julio Villa (University of Manchester), Francisco Fernández Rubiera (University of Central California), Covadonga Lamar (University of California) y Paquita Suárez Coalla (City University of New York). Los temes, de la lliteratura a la sociollingüística y de la pragmática a la emigración asturiana, abarquen un panorama bayurosu en perspeutives d’investigación.

Read Full Post »

Llingüística asturiana na Universidá de Zúrich

Los díes 2 y 3 de xunu del 2022 celebróse na Universidá de Zúrich (Suiza) el VI Alcuentru WEDISYN, que ye la sigla de Westmost Europe Dialect Syntax [Sintaxis Dialectal del Occidente Caberu d’Europa], y dedícase a los fechos de variación de les llingües de la Península Ibérica.

Nesta edición del WEDISYN, la llingüística asturiana tevo representada por trés comunicaciones:

●Ramón de Andrés Díaz, «Colocación de clíticos pronominales en la frontera entre el gallego y el asturiano».

●Miguel Rodríguez Monteavaro, «Nuevos datos de morfosintaxis verbal del área centro-occidental de Asturias».

●Xulio Viejo Fernández, «Número asociativo, concordancia ad sensum y cuantificación en asturiano».

Read Full Post »

La Revista de Filoloxía Asturiana va camudar de títulu y configuración

Acaba d’apaecer el númberu 17 de la «Revista de Filoloxía Asturiana» col que se zarra una etapa qu’entamó nel añu 2001.

D’agora en delantre, la revista acoyeráse a una nueva orientación qu’implicará un cambiu de títulu y de configuración y d’ello daráse anuncia a lo llargo de los próximos meses.

Read Full Post »

L’Alla desenvuelve esti Payares les XXXVI Xornaes d’Estudiu

L’Academia de la Llingua Asturiana vieno acabante d’asoleyar esti dia’l programa de les Xornaes que va organizar como tolos años del 7 al 9 del mes de Payares na Facuáltá de Filosofia y Lletres del campus delán Milán.

Les XXXIV Xornaes Internacionales d’Estudiu van celebrase como cada añu sedrá nel salón d’actos de la Facultá de Filosofía y Lletres y la inauguración va tener llugar el martes 7 a les 12 hores cola presentación de dos espublizaciones de l’Academia de la Llingua Asturiana, la edición dixital del “Lletres Asturianes 117” y el nuevu númberu de la revista dixital “Ciencies. Cartafueyos de Ciencia y Teunoloxía 7”, dixirida por Carlos Lastra.

Tres de la presentación entamarán les xornaes propiamente diches cola participación del académicu Francisco Llera Ramo (Universidá del País Vascu) que va facer la presentación en sociedá de la III Encuesta Sociolingüística de Asturias.

Read Full Post »

Asoléyase’l númberu 16 de la Revista de Filoloxía Asturiana

PABLO R. GUARDADO

El Seminariu de Filoloxía Asturiana ta acabante d’asoleyar un númberu nuevu de la Revista de Filoloxía Asturiana, el 16, correspondiente al 2016. Editáu por Trabe, tamién se pue consultar al traviés de la plataforma Reunido de la Universidá d’Uviéu.

Esta espublización añal recueye artículos d’investigación nuevos, notes, cróniques y otros conteníos nes so páxines. Na primer estaya, atopamos cinco estudios, sobre la ‘Caracterización funcional de la interxección: a propósitu de delles interxecciones del asturianu’, d’Alfredo Álvarez Menéndez; ‘El neutro de materia en asturiano: Un acercamiento sintáctico al fenómeno en cuanto a la especificidad, genericidad y la posición del adjetivo’, de Matthew J. Burner; ‘El paisaxe solidariu: léxicu y toponimia comuñera’, de Xulio Concepción; ‘{Tener/llevar} + participio en el castellano de los Siglos de Oro y algunas notas interlingüísticas’, de Patricia Fernández Martín; y ‘Diálogos políticos de los años trenta’, de Rafael Rodríguez Valdés.

Read Full Post »

L’ALLA espubliza’l númberu 114 de ‘Lletres Asturianes’

PABLO R. GUARDADO

El ‘Lletres Asturianes’ 114 yá ta disponible tanto en formatu físicu como pa la so consulta na rede al traviés de la web de l’Academia de la Llingua Asturiana (ALLA). El boletín de la institución presenta ocho trabayos d’investigación.

Abre esti númberu Olga Álvarez, de la Universidá d’Uviéu, con ‘Los verbos con prefixu a- n’asturianu’, pa depués siguir col estudiu del so compañeru d’universidá Guillermo Lorenzo, entituláu ‘¿Por qué no en asturiano? El infinitivo flexionado como ‘apomorfia negativa’ de la lengua asturiana’. Rosabel San Segundo, de la Universidade de Lisboa, fala mentes de la ‘Negación metalingüística y estructura informativa: caracterización sintáctico-pragmática de ‘non”.

Read Full Post »

La Revista de Filoloxía Asturiana llega al númberu 15

El Seminariu de Filoloxía Asturiana ta acabante d’espublizar el númberu 15 de la Revista de Filoloxía Asturiana. Esti anuariu universitariu d’estudios llingüísticos y lliterarios asturianos y románicos pue consultase al traviés de la plataforma Reunido.

Correspondiente al añu 2015, el númberu 15 de la Revista de Filoloxía Asturiana inclúi los estudios ‘La influyencia de la “concordancia continua” del asturianu nel castellanu faláu n’Asturies’, por Andie Faber (University of Massachussets); ‘Un volume de testos de poesía asturiana de reciente apaición’, obra de Xuan Carlos Busto Cortina (Universidá d’Uviéu; ‘The influence of the focus structure on the placement of pronominal clitics in Asturian’, escrito por Avelino Corral Esteban (Universidad Autónoma de Madrid); ‘Necesitatea unui studiu sociolingvistic în Pola de Siero’, firmao por Cristina Bleorţu (Universidá d’Uviéu / Universität Zürich); ‘Una de derechos lingüísticos: varios conceptos sociolingüísticos aplicables a la situación del asturiano’, de Benat Garaio Mendizabal (SOAS University of London).

Read Full Post »

Les XXXIV Xornaes Internacionales d’Estudiu de l’ALLA van celebrase del 3 al 5 de payares

La presentación del númberu 5 de la revista ‘Ciencies’ y de la edición dixital del ‘Lletres Asturianes 113’ va abrir esta edición, con sede n’Uviéu. El plazu pa matriculase fina esti xueves.

El salón d’actos de la Facultá de Filosofía y Lletres torna a acoyer estos trés díes de ponencies, alderiques y comunicaciones sobre la llingua asturiana que cuenta cola presencia d’espertos procedentes de dientro y fuera d’Asturies. L’entamu ta previstu pal martes a les 16 hores, a lo que va siguir la ponencia ‘Un enfoque polisistémicu a la traducción n’asturianu: normes y estratexes’, a cargu de Cristina Valdés, de la Universidá d’Uviéu y l’Academia de la Llingua Asturiana (ALLA), nomada recién direutora xeneral d’Universidaes y Investigación, y un alderique sobre la mesma.

Read Full Post »