La Biblioteca d’Asturies estrena’l ciclu Palabra viva dientro de la so programación d’actividaes p’adultos

La Biblioteca d’Asturies Ramón Pérez de Ayala aumenta la so programación d’actividaes p’adultos cola puesta en marcha de la primer edición del ciclu Palabra viva. Alcuentros na Biblioteca d’Asturies. Estos alcuentros, que nacen coles mires de dinamizar l’intercambiu cultural, van proponer un percorríu polos distintos xéneros de la lliteratura creada por autores asturianos, tanto en castellán como n’asturianu.

La primer sesión de Palabra viva va celebrase’l próximu miércoles, día 29, a partir de les 19:30 hores, nel salón d’actos de la biblioteca y va axuntar a los poetes Pedro Menéndez, Natalia Menéndez y Nacho González. La entrada va ser llibre pa tol públicu interesáu.

Read Full Post »

El III Seminariu ‘Oficialidá’ va dar a conocer modelos d’otros territorios y va afondar en polítiques de normalización

Iniciativa pol Asturianu ta trabayando en zarrar la participación pal III Seminariu ‘Oficialidá, el camín constitucional pal futuru del asturianu’, que va celebrar el 21 y 22 d’abril nel Aula Magna de la Universidá d’Uviéu. Responsables de política llingüística d’otros territorios van intervenir nesta cita que pretende dar a conocer modelos d’oficialidá.

Depués de les ediciones del 2018 y del 2019, la organización que trabaya pola normalización del idioma recupera esti formatu con convidaos de sonadía nos sos ámbitos y que tan bon sabor de boca dexo tanto ente los entamadores como nos participantes. La pandemia de COVID-19 dexó aparcada la fórmula, optando nel 2021, nel momentu de l’apertura de les negociaciones pa la reforma del Estatutu d’Autonomía, por un alderique de formatu reducíu con representantes de tolos grupos parllamentarios –a esceición de VOX al ser conocida la so postura–, pero agora n’otru momentu importante, coles eleiciones de mayu nel horizonte y la oficialidá otra vuelta nel centru del debate, considera afayadizu retomar el seminariu.

Read Full Post »

Presencia asturiana nel últimu volume de la revista Estudis Romànics

Estudis Romànics, publicada pol Institut d’Estudis Catalans, ye una prestixosa revista nel ámbitu de la llingüística y filoloxía romániques. Diríxenla los profesores Joan Veny y José Enrique Gargallo, verdaderes autoridaes nesta estaya del saber.

Nel últimu númberu, el volume XLV d’anguaño 2023, Estudis Romànics acueye cinco presencies de la llingüística y filoloxía asturianes:

Read Full Post »

La XDLA critica la “falta de sensibilidá” de Carreteres del Estáu cola toponimia asturiana

El portavoz de la Xunta pola Defensa de la Llingua Asturiana (XDLA), Xosé Candel, criticó esti martes que la Demarcación de Carreteres del Estáu n’Asturies nun tien “la mínima sensibilidá cola llingua del territoriu nel que tienen competencies”.

En declaraciones a Europa Press, Candel esplicó que nel proyectu p’acuriosar un tramu de la N-634, que ta en fase d’información pública, los cartelos de la señalización vertical nun cumplen la llexislación asturiana sobre toponimia oficial.

Read Full Post »

Les XLI Xornaes Internacionales d’Estudiu sedrán del 7 al 9 de payares

L’Academia de la Llingua vieno acabante facer anuncia que les «XLI Xornaes Internacionales d’Estudiu» van tener llugar n’Uviéu los díes 7, 8 y 9 del mes de payares d’esti añu 2023. Nesi sen, quierens tamién informar de que yá ta abiertu’l plazu pa unviar propuestes de comunicaciones.

En casu de qu’esta convocatoria seya del so interés, ha remitise’l títulu de la comunicación xunto a un resume, de 200 a 300 pallabres, onde se conseñen los oxetivos y el desarrollu de la mesma y unes referencies bibliográfiques. El día 26 d’abril de 2023 ta previsto zarrar la receición de propuestes y, enantes del mes de xunu, anunciar les comunicaciones aceutaes y el so allugamientu dientro del programa.

(d’Asturnews, 28-02-2023)

Read Full Post »

El conocimientu d’asturianu avanza nos núcleos urbanos gracies a la escolarización

Un 66,6% los habitantes mayores de 16 años d’Uviéu, Xixón y Avilés declárase falantes d’asturianu, de los que cuasi la metá muestra capacidá llectora (16,4%) o d’escritura (13,2%). Énte ellos, un 29% diz entendelo, pero nun lo fala, y otru 4,4% nin lo fala nin lo entiende.

Tanto los niveles de conocimientu, como d’alfabetización y normalización, avancen en función de la escolarización, que ye lo qu’espresa facer cuasi ún de cada cinco (18,2%) de la población metropolitana mayor de 16 años.

Asina se recueye nuna encuesta sociollingüística con 500 entrevistes realizaes pola Academia de la Llingua Asturiana (ALLA) y con un avance de resultaos que presentó esti martes el catedráticu de Socioloxía y autor del informe, Francisco Llera Ramo, y el presidente de l’ALLA, Xosé Antón González Riaño.

Read Full Post »

La XDLA entama un cursu d’asturianu de nivel básicu

Va ponelu n’Uviéu los martes y xueves dende’l día 16, con un llargor total de 20 hores.

La sede de la Xunta pola Defensa de la Llingua Asturiana (XDLA) va acoyer un cursu d’asturianu de nivel básicu a partir d’esti mesmu mes dirixíu sobre manera a persones adultes. Ésta asítiase na cai Cimavilla númberu 15, escalera A, primeru C.

Nél les alumnes y alumnos “van poder deprender el bon usu del idioma tanto a nivel escritu como oral”, esplica la organización. Les clases van ponese los martes y xueves de 19 a 21 hores hasta completar 20 hores llectives, y el so preciu ye de 30 euros, materiales incluyíos.

Read Full Post »

La poeta Lourdes Álvarez, premiu Nacional de Lliteratura Asturiana

L’Academia de la Llingua Asturiana (ALLA), con un xuráu formáu tamién por representantes de la Universidá d’Uviéu y del Principáu, decidió concedéi a la poeta Lourdes Álvares el III Premiu Nacional de Lliteratura Asturiana.

El xuráu, presidíu pol presidente de l’ALLA, Xosé Antón González Riaño, tuvo formáu polos académicos Ana Cano, Xosé Ramón Iglesias y Carmen Muñiz; los profesores de la Universidá d’Uviéu Carmen Alfonso y Leopoldo Sánchez; el Premiu Nacional 2020 Xuan Xosé Sánchez Vicente; y, faciendo de secretariu’l director xeneral de Política Llingüística del Principáu, Antón García.

Read Full Post »

La llingua asturiana yá tien los sos primeros “olímpicos”

ILLÁN GARCÍA

Finalistes de Secundaria: Álvaro Ordóñez, Vidal Quidiello, Lucía Doce, Xulia Antuña, Alberto Antuña, Favila Velasco, Naiara Suárez, Nerea Menéndez y Carla Bote.

La llingua asturiana tien falantes, escritores, académicos y, dende va delles selmanes, tamién “olímpicos”. Son estudiantes de Primaria, Secundaria y Bachilleratu que participaron nel primer concursu de redaición que lleva’l nome de Urbano Rodríguez, académicu de la llingua, que morrió en marzu de 2022. La Olimpiada escolar axuntó alumnáu de dellos centros asturianos, que pasaren delles prebes enantes de la gran final, na sede de l’Academia de la Llingua Asturiana, na cai del Águila d’Uviéu. Ehí, Xulia Antuña Ezama, del IES Santa Bárbara de Llángreu, algamó’l primer premiu na categoría de Secundaria y Bachilleratu. El navetu Favila Velasco Benavides, del IES Peñamayor, foi segundu. En Primaria, el primer premiu quedó n’Uviéu y foi pa la escolina Daniela González Villota, del colexu públicu de San Cloyo, y el segundu viaxó pa Bimenes, pa Gadea Iglesias Coto, del colexu de Martimporra.

Cada categoría tenía la so dificultá. Si na de Secundaria los participantes de la final teníen qu’escribir sobre alimentación, nutrición y costumes de vida saludable, y con un testu nel qu’apaecieran les pallabres “tán” y “tan”, amás de “xinta”, “sicasí” y “dafechu” y un neutru de materia, los de Primaria habíen cuntar una hestoria basada nunes viñetes na que teníen que nomase un día de la semana, les negaciones “non” y “nun” y les pallabres “suañu”, “portiella” y “molín”.

Con eses blimes, los “olímpicos” afondaron nel so maxín y armaron testos bien afayadizos. Los ganadores recoyeron los sos premios el pasáu 21 d’avientu, el mesmu día que l’Academia de la Llingua Asturiana entregó los sos obres premiaes del certame d’investigación, como’l de recoyida de material toponímico oral, que foi pa Xabiel Fernández y Lena Valladares; el de propuestes de terminoloxía especializada, que ganó Víctor Suárez; el de recoyida de material lliterario inédito, a Adrián Martínez; el de recoyida, trescripción y estudiu de testos orales, que recibió Claudia Elena Menéndez, y el de documentalismu sociocultural curtiu, que llevó Pablo Cueto. Y dende esi día l’asturianu tien tamién “olímpicos”.

(de La Nueva España, 31-01-2023)

Read Full Post »

El Principín y 1809, les obres n’asturianu más vendíes en Cervantes en 2022

La llibreria Cervantes, la más importante en volume de ventes n’Asturies, tien como obra lliteraria n’asturianu más vendida a lo llargo de 2022 la traducción de Xosé Lluis García Arias d’El Principín, la clásica obra d’Antoine de Saint-Exupéry tornada a más de quinientes llingües y, nesti casu, editada pola ALLA. Darréu, la obra más vendida ye 1809: Cartes de la Revolución de Trubia, escrita por Andrés Fernández con namás que diecisiete años y editada por Radagast. Esta obra de xéneru epistolar presenta un Asturies ucrónica que se dixebra históricamente de la real.

De siguío, les obres más vendíes en Cervantes son de non-narrativa:

La primera, la historia de la música asturiana que percuerre Xune Elipe n’Hai una llinia trazada, editada por Trabe. La segunda, la guía gastronómica de David Castañón Les Farturrutes: Caleyar y comer n’Asturies, editada por Delallama. Y la tercera, el llibru-CD Ente la niebla de Dixebra, que nuna coincidencia sorprendente empata en ventes coles trés siguientes obres de narrativa, que comparten el bronce nesti xéneru.

Read Full Post »