Preséntase’l programa de la Selmana de les Lletres dedicada a Conceyu Bable

El Gobiernu d’Asturies homenaxa a Conceyu Bable na 45 Selmana de les Lletres Asturianes, que se va desenvolver del 29 d’abril al 8 de mayu. Esti movimientu , que tuvo un papel bien importante na defensa de la llingua y la cultura d’Asturies na transición democrática, centra la programación d’esta cuadraxésima quinta edición.

Los actos, qu’incluyen esposiciones, conciertos, meses redones y presentaciones, amás de la entrega de premios de los certámenes escolares, van tar repartíos ente Uviéu, Xixón, A Veiga, y Corvera. 

Read Full Post »

Asoleyáu’l númberu 130 de Lletres Asturianes

SUSANA SELA

El númberu 130 de Lletres Asturianes (LLAA), correspondiente al mes de marzu del añu 2024, agospia artículos qu’estudien aspeutos llingüísticos, llexicográficos, toponímicos, históricos y lliterarios. Estes contribuciones, de gran valir, faen por enanchar el corpus de la publicación y de los estudios sobre la llingua y la lliteratura asturianes.

Nesta ocasión los trabayos d’investigación son seyes y abarquen estremaos ámbetos, dende la hidronimia y la toponimia fasta un certeru analís del verbu sentir o un estudiu hestóricu de los anicios del proyeutu d’una Academia de la Llingua Asturiana, pente otros.

Read Full Post »

“Ye de xusticia reconocer la importancia histórica que tuvo Conceyu Bable”, afirma González Riaño

PABLO R. GUARDADO

Esti xueves l’Academia de la Llingua Asturiana (ALLA) entama n’Uviéu una xornada conmemorativa dedicada a Conceyu Bable baxo’l nome de ‘Xorrecíes tán les manes’. Nel 2024 cúmplense 50 años de la fundación d’esta organización.

El salón de la Biblioteca d’Asturies ‘Ramón Pérez de Ayala’ va acoyer dende les 16 hores la totalidá de la programación prevista pa esta celebración, que va contar cola presentación d’un videu conmemorativu, ponencies, una mesa redonda y una actuación en direuto, con entrada llibre hasta completar aforu. “Pa l’Academia de la Llingua Asturiana, Conceyu Bable foi una organización sociocultural mui importante y determinante dende los años 70 del sieglu pasáu na dignificación de la llingua y la cultura n’Asturies. Consideramos que Conceyu Bable ye la institución, la organización qu’orixina, pola so dinámica y poles sos demandes, la propia Academia de la Llingua Asturiana y tien total sentíu facer esta xornada de conmemoración de los sos 50 años”, apunta’l so presidente Xosé Antón González Riaño, que va encargase d’abrir la xonrada en compañía de Pilar Rubiera.

Read Full Post »

L’ALLA celebra’l mediu sieglu de Conceyu Bable con una xornada conmemorativa

L’Academia de la Llingua Asturiana (ALLA) entama una xornada d’alcordanza y reivindicación de Conceyu Bable, abriendo con ella un añu nel que’l mediu sieglu d’aquella asociación va marcar l’axenda del asturianismu cultural y llingüísticu.

Baxo’l títulu “Xorrecíes tán les manes. Mediu sieglu de Conceyu Bable na perspeutiva de l’Academia de la Llingua Asturiana”, la xornada conmemorativa que programa l’ALLA va cuntar con delles actividaes que la institución va dir anunciando d’equí a poco. Ente elles, dalgunes ponencies, una mesa redonda, la presentación d’un videu y una amuesa de música en direuto.

Read Full Post »

Una “edición crítica” de la Nodicia de Kesos “reinterpreta” dellos términos y fixa’l so orixe nel añu 974

Los profesores José Manuel Ruiz Asencio y José Ramón Morala presentaron esti miércoles en Llión una “edición crítica” de la Nodicia de Kesos, ún de los testos romances más antiguos que se conoz y primer muestra escrita onde se ve l’orixe de la llingua asturiana o asturllionesa, que permite “reinterpretar” dalgunos de los términos “que se borraren o se lleíen peor” y que “muestra una versión nueva sobre les feches de les que procede’l testu, cifrándoles nel añu 974”.

Asina lo esplicó la viceconseyera d’Acción Cultural de la Conseyería de Cultura, Turismu y Deporte de la Junta de Castiella y Llión, Mar Sancho, qu’esplicó que la Nodicia de Kesos ye’l “testimoniu en llingua romance más reconocíu, más importante y más vinculáu a Llión”, nuna edición crítica que “visita y revisita” un testu, con un orixinal guardáu nel Muséu Catedraliciu de Llión.

Read Full Post »

«Palabres d’Asturies, testigos d’historia y cultura»

Esti llibru recueye cuatro conferencies correspondientes a dos ciclos celebraos en temporaes distintes y coordinaos pol profesor Ramón d’Andrés.

N’abril del 2018 celebróse nel Real Instituto de Estudios Asturianos (RIDEA) un ciclu de conferencies dedicaes al tema «Palabres d’Asturies, testigos d’historia». L’oxetivu yera l’estudiu del léxicu d’Asturies, entendiendo como talu’l propiu del asturianu xunto col que forma parte del castellanu faláu nel Principáu. Trátase d’un campu d’estudiu trabayáu enforma nel ámbitu académicu, qu’ofrez temes suxerentes d’esposición y debate. Nesti casu, el focu d’interés púnxose nel devenir históricu del léxicu d’Asturies y el so estudiu.

Read Full Post »

La XLV Selmana de les Lletres Asturianes va reivindicar el legáu de l’asociación Conceyu Bable

Nel 1974 tenía llugar la primer intervención pública de Conceyu Bable, un coleutivu clave na dignificación de la llingua asturiana, la recuperación de los símbolos y la llucha pola autonomía. Coincidiendo col so cincuentenu aniversariu, el Gobiernu va dedicar al entamu de mayu la XLV Selmana de les Lletres Asturianes a esta asociación pa “facer historia y reivindicar un legáu que tovía se percibe cercanu”.

La viceconseyería de Cultura, Política Llingüística y Deporte recuerda que “en xunu de 1974 la revista ‘Asturias Semanal’ publicaba una entrevista a trés mozos universitarios, Xuan Xosé Sánchez Vicente, Xosé Lluís García Arias y Lluís Xabel Álvarez, que facíen una llamada d’atención a la sociedá asturiana contra’l complexu d’inferioridá rexonal y pidíen la defensa de la llingua asturiana como un bien cultural, la so presencia nos medios de comunicación y na escuela, y la creación d’una lliteratura y d’un públicu pa ella”. Meses más tarde, en payares, estrenábase “una sección baxo’l nome ‘Conceyu Bable’, de la que se responsabilizaba’l Grupu CB, primero quincenal y ensiguida selmanal, que se mantuvo hasta’l final de la revista, en xunu de 1977”.

Read Full Post »

La Xira pola Oficialidá va facer homenaxe a los escritores maliayos na parada de Villaviciosa

PABLO R. GUARDADO

Del llunes al vienres la Xira pola Oficialidá que ta percorriendo’l país pa concienciar sobre la necesidá del reconocimientu llegal de les llingües d’Asturies fai parada en Villaviciosa. La Fundación Almastur y Iniciativa pol Asturianu aprovechen la estancia nel conceyu pa recordar a los autores maliayos de los últimos sieglos y homenaxar a los actuales.

Depués de Bimenes, n’abril, y de Samartín del Rei Aurelio, el mes pasáu, Villaviciosa ye’l siguiente llugar n’acoyer les esposiciones y actividaes de la Xira pola Oficialidá, que s’adapten en parte a cada conceyu. La Casa los Hevia va ser la sede de les cuatro primeres xornades, con entamu’l llunes a les 19 hores cola inauguración insitucional y l’apertura de la esposición ‘Voces, una hestoria de la llingua asturiana’ y la de llibros básicos sobre l’asturianu qu’inclúi diccionarios, llibros de consulta y normativos, o traducciones al asturianu de grandes clásicos de la lliteratura, que se van poder visitar hasta’l vienres.

Read Full Post »

Celebróse en Salamanca’l Simposiu SIALNI, con abondosa presencia del asturianu y asturlleonés

RAMÓN DE ANDRÉS DÍAZ

Los díes 5 y 6 d’ochobre del 2023 celebróse na Universidá de Salamanca’l III Simposiu Internacional d’Aspectos Llingüísticos del Noroeste Ibéricu (SIALNI). Los anteriores fixéranse en Xénova (Italia) y Uviéu, esti nel añu 2022.

Nel simposiu hebo 21 intervenciones (2 conferencies plenaries y 19 comunicaciones). D’elles, 9 teníen como oxetu d’estudiu l’asturianu y l’asturlleonés, incluyida una de les dos conferencies plenaries. Amás, una comunicación foi sobre’l gallegu d’Asturies.

Read Full Post »

Uma língua não morre enquanto andar no sentir e no falar

LUÍSA PINTO

‘O domingo amanheceu com um sol tímido, a permitir uma bonança que a trovoada da madrugada quase espantou. E, seja sábado ou domingo, Inverno ou Verão, os dias de Domingos Manuel Alves, começam quase sempre da mesma maneira. Cedo, com o sol, porta fora, a caminhar pelo planalto. “Toda a vida fui pastor”, diz ele, com 84 anos, bata vestida por cima da roupa, a esconder um eventual fato domingueiro. Talvez não o use, até porque nem sabe se neste domingo há ou não missa na aldeia de Malhadas. “O padre vai a muitas aldeias, não vem cá todos os domingos. Só há missa quando ouvimos o sino a tocar.”

Domingos toda a vida foi pastor, mas já não tem gado para pastar. Mesmo assim, quer que os dias se mantenham iguais. E quando o dia nasce, é preciso pôr os animais cá fora. Agora não tem vacas, mas tem duas burras, a Andorinha, de 11 anos, e a Marta, de quase um. Os burros sempre o ajudaram a lavrar os campos. “Agora já não fazem nada”, revela. Ou fazem muito – afinal, fazem-lhe companhia nestes passeios matinais.

Read Full Post »