L’ALLA publica l’estudiu cola toponimia de Peñaflor (Grau)

L’Academia de la Llingua Asturiana (ALLA) publicó’l númberu 144 de la colección ‘Toponimia’. Trátase d’un trabayu de Xabiel Fernández García que recueye la toponimia mayor y menor de la parroquia de Peñaflor, en Grau.

Al testu premiáronlu nel certame d’investigación de l’ALLA, onde foi ganador na modalidá de la onomástica del terrén, y ofrez delles notes históriques afitaes nuna documentación fonda. Cola de Peñaflor yá son seis les toponimies moscones asoleyaes nesta coleición.

La publicación ta disponible nes llibreríes asturianes y na llibrería del llar social de l’ALLA, n’Uviéu.

(d’Europa Press, 08-01-2024)

Read Full Post »

Miguel R. Monteavaro publica l’atles llingüísticu ELCOA, sobre la llende ente l’asturianu occidental y central

RAMÓN DE ANDRÉS DÍAZ

Nel marcu del III Simposiu Internacional «Aspectos Llingüísticos del Noroeste Ibéricu» (SIALNI), celebráu na na Universidá de Salamanca los díes 5 y 6 d’ochobre de 2023, Miguel Rodríguez Monteavaro, llingüista de la Universidá d’Uviéu, presentó la obra titulada «Estudiu Llingüísticu nel Centru-Occidente Asturianu (ELCOA). Pequeñu atles dialectográficu».

L’ELCOA, llibru de 820 páxines, ye un completu atles llingüísticu fechu sobre 20 llugares de 8 conceyos allugaos na llende llingüística del asturianu occidental y del asturianu central.

Read Full Post »

La 44 Selmana de les Lletres Asturianes va rindir homenaxe al poeta y críticu lliterariu Xosé Bolado

La 44 Selmana de les Lletres Asturianes, que va celebrase ente’l 28 d’abril y el 6 de mayu, va rindir homenaxe a la figura del poeta y críticu lliterariu Xosé Bolado, fallecíu en mayu del 2021. Xosé Bolado, académicu de la llingua asturiana y profesor, ye una figura central de la recuperación llingüística y lliteraria d’Asturies na Transición. La programación incluye la estrena del documental Na firida del cementu. Vida y obra de Xosé Bolado, dirixíu por Ana Lamela, y tamién la edición de dos llibros conmemorativos alredor de la contribución decisiva que la figura de Xosé Bolado supunxo pa la llingua y la lliteratura asturianes.

Asina, Xosé Bolado. Fálame duce recueye la semblanza que distintos amigos y personalidaes del mundu de la cultura tracen sobre l’autor uviedín, no personal y tamién na aportación que fizo como poeta, como militante sindical y políticu y na so dimensión de críticu y estudiosu de la llingua y de la lliteratura n’asturianu. La obra, coordinada por Marta Mori, edítala’l Gobiernu del Principáu d’Asturies con realización editorial de Trabe.

Read Full Post »

Morrió Pepa Las Murias, referente del patrimoniu oral asturianu

María Josefa Fernández, conocida popularmente como Pepa Las Murias, morrió esti llunes 19 d’avientu a los 99 años n’Uviéu. Pepa Las Murias, yera una de les referentes ente los investigadores pa recoyer la tradicción oral asturiana.

Natural de Grau, foi la imaxe de los discos del grupu musical Tuenda y apareció nel primer capítulu del icónicu programa de TPA ‘Camín de Cantares’, presentáu por Xosé Antón Ambás. L’éxitu del espaciu foi tal, que Pepa llegó protagonizar l’especial de navidá del formatu.

Read Full Post »

El documental ‘Xente de Grau, feries ya mercáu’ repasa la historia del comerciu na villa moscona

Nel marcu de les XV Xornaes d’Estudios Locales de Grau, esti xueves 15 d’avientu a les 19.30 hores, va presentase l’audiovisual ‘Xente de Grau, feries ya mercáu’, un trabayu realizáu por Xosé Ambás y Ramsés Ilesies en collaboración con Paloma Sánchez y Santiago Rodríguez.

Esti audiovisual forma parte del trabayu que l’equipu realizó nel últimu añu recoyendo testimonios sobre la historia comercial de la villa. Nél recueyen les esperiencies vitales de más d’una trentena de vecines y vecinos de tol conceyu pa conocer la historia del comerciu local, los mercaos y feries, los productos tradicionales, les zones del mercáu, los establecimientos y les industries históriques de la villa.

Read Full Post »

L’ALLA comunica los ganadores de los sos concursos del Certame d’Investigación

Yá se conocen tamién los finalistes de la Olimpiada Escolar de Redaición Urbano Rodríguez que se celebra’l día 21.

Ocho años depués l’Academia de la Llingua Asturiana (ALLA) tornó a convocar los sos concursos. Per un llau tán los del Certame d’Investigación y, per otru, los destinaos a escolines y escolinos.

Los diferentes xuraos convocaos pola institución académica decidieron conceder el Xosé Bolado de recoyida de material lliterario inédito anterior a 1970 a Adrián Martínez Expósito por ‘Nel corazu de casina (1932-1934) de Fernán Coronas’; el de Documentalismu Sociocultural Curtiu a Pablo Cueto pa ‘Indianos d’azucre’; y el de Recoyida, Trescripción y Estudiu de Testos Oralespa Claudia Elena Menéndez Fernández por ‘Averamientu a la caracterización del asturianu de La Güeria Carrocera (Samartín del Rei Aurelio)’, que tamién recibe un premiu especial.

Read Full Post »

La promoción del asturianu mantiénse nel 0,04% del total del presupuestu

La partida pa promoción del asturianu recoyida nel proyectu de presupuestos pa 2023 xube a 2.535.701 euros, lo que supón –al igual que nes cuentes del 2019, 2020 y 2021– el 0,04% del total.

Nos presupuestos vixentes la promoción del asturianu tenía una partida de 2.205.441 euros, polo que la política llingüística pal 2023 xube en 330.260 euros. Sicasí, al producise una medría xeneral del presupuestu autonómicu, la partida continúa representando’l 0,04% del total de les cuentes.

Read Full Post »

El proyectu ‘Falamos’ lleva 19 cursos en 17 conceyos

El proyectu Falamos d’enseñanza non reglada gratuita d’asturianu y gallego-asturianu pa persones adultes qu’entama’l Principáu cola Federación Asturiana de Conceyos (FACC) yá tien 19 cursos en 17 conceyos.

Asina, hai dos cursos en Mieres y Uviéu y ún en Ribeseya, Llanes, Bimenes, Llangréu, Carreño, Corvera, Grau, Valdés, L.lena, Llaviana, Castrillón, Tapia, El Franco, Navia y Xixón.

Read Full Post »

El discu del concursu ‘Al son del cantar’, un recursu nuevu pa la clase de Llingua Asturiana y Gallego-asturiano

Les maestres y maestros de Llingua Asturiana y Gallego-asturiano disponen d’un recursu nuevu pa trabayar nes aules col alumnáu. Yá ta disponible en plataformas dixitales y va distribuyise de manera física per toles escueles del país el discu coles diez canciones de ‘Al son del cantar’, concursu que ta acabante de celebrar la so gala.

Destináu a escolines y escolinos de cuartu de Primaria a segundu de la ESO, esta iniciativa buscaba estimular el deprendimientu significativu del alumnáu per aciu de la investigación, el descubrimientu y la creatividá nel campu de la música. Nel aula habríen de componer una lletra pa un cantar a partir d’una melodía tradicional o orixinal pa valoración del xuráu encargáu de facer la escoyeta de los diez meyores pa la grabación del discu por parte de bandes o artistes con trayeutoria.

Read Full Post »

La Rede de Normalización Llingüística falla los cantares ganadores del concursu escolar ‘Al son del cantar’

El proyectu ‘Al son del cantar’ yá tien ganadores de la edición 2021/2022. Nesta convocatoria participaron centros educativos de primaria y secundaria de los conceyos de Cuaña, Navia, Grandas de Salime, Xixón, Cangas del Narcea, Grau, Nava, Sariegu, Ḷḷena, Gozón, Carreño y Castrillón, convocaos polos Servicios de Normalización Llingüística de los conceyos mentaos.

Trátase d’un proyectu en forma de concursu musical pa los cursos de cuartu, quintu y sestu de Primaria y primeru y segundu de la ESO, que quier estimular l’aprendizaxe del alumnáu al traviés de la investigación, el descubrimientu y la creatividá nel campu de la música.

Read Full Post »