Más errores nel usu de la toponimia oficial: “¡Nun ye tan difícil mirar el BOPA!”

La Xunta pola Defensa de la Llingua Asturiana (XDLA) ta acabante de denunciar errores nuevos nel usu de la toponimia tradicional, única oficial. Una dase nuna carretera de titularidá autonómica y otra nel cartelu de la Vuelta a Asturies, entamada por una entidá privada.

El primer error atópase nun cartelu de la carretera AS-15, el corredor d’El Narcea, “puestu hai dos díes”, onde se pue ver l’usu d’un inesistente topónimu billingüe ‘Zarréu/Cerredo’ cuando la única forma oficial ye Zarréu. Pa completar el fallu, el nome apaez mal tildáu: ‘Zarreú’.

Read Full Post »

L’Atles llingüísticu del Navia-Eo ponse n’accesu llibre

Dende esta selmana cabera d’ochobre, l’atles llingüísticu ETLEN que se publicara nel añu 2017, puede descargase llibremente nuna web propia na Universidá d’Uviéu, que brinda a quienes-yos pete emplegalu un accesu directu.

La obra Estudiu de la Transición Llingüística na Zona Eo-Navia (ETLEN, Asturies) publicóse nel añu 2017, en coedición de la Universidá d’Uviéu y Ediciones Trabe. Ye’l frutu d’un trabayu fechu na zona Eo-Navia a lo llargo de 14 años.

Read Full Post »

El decretu nuevu de toponimia que va permitir oficializar los nomes xeográficos va publicase esti mesmu añu

PABLO R. GUARDADO

Política Llingüística cuenta con disponer d’un decretu nuevu de toponimia “enantes de que termine esti añu” y poder entamar asina cola oficialización de los nomes asturianos de montes, ríos o sableres. La Comisión Especializada de Toponimia Xeográfica fixo importantes avances na llexislatura pasada pa la so recuperación.

El decretu actual, de xunetu del 2002, taba namás pensáu pa los nomes de población, un procesu que ta práuticamente completáu, yá que namás queden 4 de los 78 conceyos por aprobar el so espediente. Son Navia –el que taba más avanzáu–, Cuideiru, Allande y Ibias, que nun pudieron zarrase la llexislatura pasada como yera’l deséu de la Conseyería de Cultura, Política Llingüística y Turismu, cola intención de que se retome yá depués de los cambios vivíos nes diferentes corporaciones llocales.

Read Full Post »

“Esta edición de ‘Suenos’ ía algo importante pa mi por el QR, pa que s’escuite”, afirma Rosa Cunqueira

PABLO R. GUARDADO

Nel mes de xunetu, en Trabáu, presentábase la segunda edición de ‘Suenos. Versos cunqueiros’, de Rosa Cunqueira, primer obra na variante cunqueira del asturianu, espublizada nel 2011, que llega agora cola novedá de ser un “audiod.dibru”. La propia autora grabó nel estudiu de Cuatro Gotes Producciones los poemes y desplazóse a esi mesmu llugar de Xixón pa dar a conocer el so trabayu.

“Esta edición de ‘Suenos’ ía algo importante pa mi por el QR, pa que s’escuite, y outro porque’l 25 cientu se va donar a un proyecto guapísimo que creamos tando Viturino vivo que se llama #SalvaElMundoRural”, espresó Rosa Rodríguez, más conocida como Rosa Cunqueira. En concreto destínase’l “25 por cientu dus cuartos que se saquen” p’acabar de restaurar el Mulín de Rusil, en Vid.dardecendias, nel conceyu d’Ibias.

Read Full Post »

Navia, Ayande, Cuideiru y Ibias son los únicos conceyos pendientes d’oficializar la so toponimia

El Conseyu de Gobiernu aprobó esti vienres la toponimia oficial de Somiedu, polo yá son 74 de 78 los conceyos colos sos nomes tradicionales oficializaos. Asina, namás Navia, Ayande, Cuideiru y Ibias tán pendientes d’acabar esti procesu.

Los trés primeros tán gobernaos pol PSOE, mentes qu’Ibias tien una alcaldesa ‘popular’. A lo llargo d’esti mandatu, l’Executivu autonómicu dio lluz verde a la toponimia de 8 de los 12 conceyos pendientes d’oficializar, concretamente la de Cabrales, Castropol, El Valle Baju Peñamellera, Llanera, Pravia, Salas, Caravia y Somiedu.

Read Full Post »

Un total de 12 conceyos esperen pola so toponimia

Tres l’aprobación de la toponimia d’Eilao, 66 de los 78 conceyos asturianos yá tienen la so toponimía tradicional aprobada. Solo falten 12 conceyos por aprobar la recuperación llingüística tradicional. En toos ellos, el procesu yá entamó pero ta en distintes fases. Nel final de la llista tán Pravia y Navia, qu’acaben d’entamar el so espediente.

D’otra manera, Salas y Castropol tiénenla mui avanzada namás pendiente de llegar a un alcuerdu p’afitar dos topónimos. Sicasí, en cinco conceyos l’espediente ta paralizáu por distintes causes. Esta situación socede en Cuideiru, Caravia, Llanera, Somiedu y Allande.

Read Full Post »

El Gobiernu asturianu afirma que la llei diz que los topónimos “tienen que tar na so forma tradicional”

El director xeneral de Planificación Llingüística y Normalización del Principáu, Fernando Padilla, afirmó que’l programa de gobiernu del Executivu al que pertenez fala de dar un impulsu a la normalización y que, nesi sentíu, “la toponimia ye una parte fundamental”. “Esto nun ye namás qu’aplicar lo que diz la Llei d’Usu, qu’establez que los topónimos d’Asturies tienen que tener la so denominación oficial d’alcuerdu cola so forma tradicional”, indicó.

En declaraciones a Europa Press, el director xeneral afirmó qu’asina se recueye na llexislación vixente y nel programa de política llingüística que presentó’l conseyeru d’Educación y Cultura, Genaro Alonso, “y dende que principiamos esta llexislatura yá hubo 13 sesiones de la Xunta Asesora de Toponimia énte les siete qu’hubo nes dos anteriores”.

Read Full Post »

Iniciativa pol Asturianu pon en marcha un ambiciosu programa de formación con cursos per toa Asturies

Iniciativa pol Asturianu lleva organizando cursos d’asturianu dende la fundación de la organización. Los cursos en Xixón y n’Uviéu son habituales, asina como los cursos a distancia. Amás hebo delles esperiencies formatives n’otros llugares, como València. Agora, y na esmolición por llegar al máximu númberu de persones interesaes por alfabetizase o deprender asturianu, la organización fai un esfuerciu organizativu y de recuersos pa poner en marcha clases d’asturianu en 15 cursos en conceyos d’Asturies, incluyendo un cursu de gallego-asturiano n’Ibias, asina como’l so programa habitual d’enseñu a distancia al traviés d’una plataforma Moodle.

Los cursos van celebrase d’una punta a otra d’Asturies, dende Ribeseya a Ibias, pasando peles villes orientales de Les Arriondes o Cangues d’Onís, les grandes ciudaes d’Avilés, Xixón y Uviéu, o les cuenques mineres, con cursos en Sotrondio, Mieres, Llangréu y La Pola (L.lena). Súmense tamién llugares como Posada (Llanera), Candás (Carreño) y Valdesoto (Siero), nel mayor programa de cursos d’asturianu puestu en marcha por una organización asociativa.

Read Full Post »

“Ye la llexislatura con más diputaos a favor de la oficialidá, 17 de 45”

PABLO R. GUARDADO

Segunda y cabera parte de la entrevista a Inaciu Galán y González (Xixón, 1986), presidente d’Iniciativa pol Asturianu, que va viaxar esta selmana a Suiza pa intervenir na ONX.

Nestos trés años, dende que nació Iniciativa pol Asturianu, ¿la situación del idioma vivió avances o retrocesos?
La situación ye mala y va peor, no que cinca a la vitalidá de la llingua y a que les autoridaes siguen ensin garantizar la llibertá de los ciudadanos pa qu’al terminar el sistema educativu puedan escoyer qué llingua falen, porque salgan bien formaos n’asturianu y castellán, y porque esista una oficialidá que garantice’l drechu a usala en tolos ámbitos.

Por embargu, el sofitu de cada vegada más partíos de tol espectru políticu y l’enorme consensu social a favor del asturianu, más d’un 60% de partidarios de la oficialidá según les encuestes, faenmos ser positivos al respective del futuru. Tamos a tiempu de cambiar la tendencia que lleva l’asturianu hacia la desapaición en poques décades y tamos enfotaos en que vamos consiguilo.

Nel ámbitu de la reivindicación ta faciéndose cada vegada un meyor trabayu. L’importante llabor reivindicativu de la Xunta pola Defensa de la Llingua Asturiana impulsando la manifestación cada añu; el llabor sectorial de Softastur, nel campu de la informática; de Reciella, families pol asturianu, cola tresmisión del idioma a los neños; y otres organizaciones d’otru tipu como El Ronchel, Ástura, El Teixu, N’Ast, Faceira y Furmientu en Lleón, grupos de trabayu dientro de los partíos, asociaciones, llocales sociales…

Hai un movimientu plural, ampliu y que ye exemplu de convivencia. Tovía mos queda, sí me paez, un pasu más, una mayor coordinación de tol movimientu.

Read Full Post »

Decenes de conceyales usen l’asturianu na toma de posesión

IxA informa de que conceyales de más de 20 conceyos ficieron la promesa o xuramentu n’asturianu. En Xixón hasta 7 conceyales de Xixón sí Puede, IX y Foro usaron esta fórmula

No que cinca a los conceyos de les grandes ciudaes del centru d’Asturies, hebo representantes que xuraron o prometieron n’asturianu en Xixón, Avilés y Uviéu, con conceyales del PSOE, Foro, Izquierda Xunida y les formaciones venceyaes a Podemos. Amás, xuraron cargu n’asturianu o gallego-asturiano en Villaviciosa, Carreño, Llanera, Siero, Noreña, Mieres, Llangréu, Llaviana, Ribeseya, Cangues d’Onís, Peñamellera Alta, L.lena, Uviéu, La Ribera, Sobrescobiu, Pravia, Bimenes ya Ibias.

Read Full Post »