Dingurindaines, poesíes pa neños ye’l llibru nuevu que publica Cristina Muñiz Martín cola editorial Asturtoons y dibuxos d’Enrique Carballeira. La obra repasa un piñu de personaxes fantásticos como un elefante que vive en La Pola, una xana que canta una nana, o una neña, Celina, a la que nun-y presta dir a escuela y fai trampes pa parecer enferma.
Ye’l primer pasu de Cristina Muñíz na lliteratura ilustrada, xéneru nel que va publicar más obres nestos meses que vienen. El llibru tamién ye’l primer títulu de la colección nueva que saca Asturtoons, El gatu pirata, con llibros en formatu cuadráu, de 22×22 centímetros y en tapa dura.
L’autora nació en Xixón y escribió los rellatos Onde pisen poques güelles, El buscador d’hestories y Kárias. Tamién la novela Ventiocho díes o los monólogos d’Ente muyeres o Pa echar unes rises. Fixo igualmente obres de teatru y guiones pa radio.
(de Les Noticies, 13-12-2010)
Deixar un comentairo