El director de la Radio Televisión del Principáu d’Asturies, Antonio Virgili, comprometióse a remitir la quexa de la Xunta pola Defensa de la Llingua Asturiana sobre la falta d’usu de la toponimia oficial a los diferentes programes del ente pública, al envíes de “detectar los posibles errores”.
Polo menos, asina lo informó la Xunta al traviés d’una nota prensa na que da cuenta de la respuesta “inmediata” que’l responsable del mediu de comunicación públicu-y envió, tres recibir la citada quexa. La organización mandárala’l primeru de febreru pasáu, pidiendo que se respetare la llegalidá toponímica nes sos emisiones.
Na contestación, según la Xunta, Virgili declárase “consciente del llabor del Ente Públicu como divulgador y promotor de la cultura y la llingua asturiana”. Esclara qu’en tou momentu remitiéronse al usu de les formes oficiales qu’apaecen nel BOPA, pero que pa una mayor seguridá “treslladó l’escritu de la XDLA a tolos programes y informativos de la Televisión y la Radio del Principáu d’Asturies pa que revisen l’usu que tán faciendo. El director de la RTPA agradez les suxerencies que-y faiga la XDLA p’ayudar a detectar posibles errores”.
La XDLA denunciaba na carta que nos informativos de la televisión delles veces usen les formes oficiales nos lletreros qu’acompañen la información y otres non, y que los presentadores poques veces usen oralmente la forma oficial. Lo mesmo pasa, según el colectivu, colos demás programes en cuantes al respetu a la llegalidá en toponimia.
Na radio, “l’usu de les formes oficiales ye nulu (nun siendo les formes que coinciden, evidentemente)”. Tamién se-y plantega al director de la RTPA que, atendiendo a un criteriu de normalización básicu, nel casu de los topónimos que s’aprobaron con una forma doble (Gijón/Xixón, Llangréu/Langreo, etc.) “sería aconseyable usar la forma asturiana oralmente porque’l doblete sería absurdu nesa situación”. “Usar namás la forma castellana implicaría la condena a que nunca s’oyera na televisión y la radio públiques la forma que se quier recuperar”, dicíase na carta unviada a Antonio Virgili
La XDLA agradez l’actitú collaboradora del director de la RTPA, anque anuncia que “va tar atenta al cumplimientu del compromisu que fai na so carta, amás d’aprovechar p’animar públicamente a los telespectadores y radioyentes a que faigan llegar al Ente Públicu los errores que detecten nes sos emisiones”. Como esplicaba la XDLA na so carta, “la oficialización nel BOPA de les denominaciones de les entidaes de población implica qu’estes s’usen siempre, oralmente y nes rotulaciones, independientemente de la llingua na que se faigan los programes”.
(d’Europa Press, 20-02-2013)
Tierra alantre, la mesma fala 
Deixar ua Respuosta