Los díes 22 al 24 de xunu celebróse na Universidá d’Aveiro (Portugal) el II Congresu Internacional de Variación Llingüística nes Llingües Romániques. Previstu pa xunu del añu pasáu, tevo que s’apostalgar a esti añu 2021 pola pandemia del covid.
Nesta importante xunta científica la llingua asturiana tevo representada por trés investigadores de la Universidá d’Uviéu.
Miguel Rodríguez Monteavaro lleó una comunicación titulada «Nuevos datos dialectales del asturlleonés: análisis dialectográficu y dialectométricu». Nella ufrió un adelantu de dellos datos reveladores que faen parte de la tesis doctoral na que ta trabayando, centrada nel estudiu de la frontera dielectal ente l’asturianu central y l’occidental con nueves metodoloxíes cualitatives y cuantitatives.
Pela so parte, Xulio Viejo Fernández disertó sobre’l tema «Subsistemes vocálicos n’asturianu occidental», onde espunxo una novedosa teoría sobre los comportamientos del vocalismu tónicu y átonu nes variedaes dialectales del asturianu y la so distribución xeolectal nel conxuntu de les variedaes xeográfiques.
A últimes, Ramón d’Andrés faló de «La frontera asturiana ente’l gallegoportugués y l’asturlleonés: un análisis cuantitativu». Valiéndose de los datos xeolectales que se recueyen nel astles ETLEN (espublizáu nel 2017), presentó novedosos «mapes d’isogloses cuantitatives», que marquen la llende ente’l gallego-asturianu y l’asturianu occidental.
Estes aportaciones verán la lluz nun llibru que s’editará d’equí a unos meses.
(del Seminariu de Filoloxía Asturiana, 27-06-2021)
Tierra alantre, la mesma fala 
Deixar ua Respuosta