Maneres d´echase al monte

ANTÓN GARCÍA

Dende l’añu 2002, el Centru Asturianu de Madrid vien convocando un estimable concursu de cuentos n’asturianu, rindiendo homenaxe a ún de los principales impulsores de la recuperación cultural asturiana de los años setenta del sieglu XX: Xosé Álvarez. Esti escritor que da nome al premiu naciera en Cigüedres, Miranda, en 1948, y dexónos un puñadín de cuentos enantes de morrer prematuramente en 2001, pero foi sobre too un exemplu de trabayu y entrega pola causa asturianista, poniendo en marcha’l Conceyu d’Asturies en Madrid. L’accésit lleva’l nome d’otru escritor, Xosé León Delestal (1921-1989), impulsor de l’Asociación d’Amigos del Bable y poeta festivu de posguerra.

A lo llargo d’estos años el premiu cayó dacuando n’escritores d’amplia traxectoria lliteraria, Xabiero Cayarga, Carlos Rubiera, Xosé María Rodríguez de Bimeda o Lluís Portal, alternando n’ocasiones con autores mozos, de menor recorríu públicu: Arturo Somoano, Abel Martínez, Alberto Suárez o Pablo Rodríguez Alonso. Coincidiendo col fallu del IX premiu, que foi parar a les creatives manes d’Adolfo Camilo Díaz, el Conseyu de Comunidaes Asturianes que preside Manuel Fernández de la Cera editó les obres de la convocatoria anterior, resultando ganador (Premiu Xosé Álvarez) José Luis Rendueles, y accésit Esther García col cuentu «La boda».

«Furtivu» el cuentu de Rendueles, tien dalgo de relatu tradicional resueltu por un autor con oficiu. Alredor de la mesa d’un chigre, un vieyu comparte pintes y cachinos de la so vida con un interlocutor que casi nun se manifiesta hasta’l final. A través de la narración del vieyu sabemos que foi de casa probe, que vive solu porque la muyer morrió y los fíos marcharon, que’l trabayu nunca lu echó p’atrás y que-y prestaba la caza. L’aventura de la so vida corrióla por mor de la so afición a la escopeta, y bona parte del relatu cuenta cómo llevantó un enorme osu al mesmísimu Franco y les razones personales pa facelo. Lo que nos tresmite’l vieyu tien interés, especialmente pola capacidá narradora de Rendueles, pola atención qu’empresta a los pequeños detalles y poles pincelaes evocadores, tan acertaes, anque ye posible que’l formatu de cuentu quede pequeñu pa tanta vida.

Hai qu’agradecer a los responsables del premiu, Centru Asturianu de Madrid y Conseyu de Comunidaes Asturianes, la puntualidá cola que vienen publicando los ganadores y accésits. Quiciabes s’eche en falta nestes guapes ediciones non venales saber qué xente formaba’l xuráu (diz muncho d’un premiu) y, tamién, que’l llibru nun llegue a les llibreríes.

(de La Nueva España, 03-03-2011)