La esposición ‘N’el falar de la mio tierra’ amuesa material de Manín de La Llosa

L’avilesín Palaciu de Valdecarzana acueye la esposición ‘N’el falar de la mio tierra’. Ésta ta dedicada a la vida y obra del escritor Gabino Muñiz García-Robés ‘Manín de La Llosa’.

L’amuesa acueye material bibliográficu y personal del autor avilesín donáu pola so familia al conceyu, un llegáu que los téunicos municipales consideren “un conxuntu reducíu en tamañu, pero d’un gran interés p’Avilés y Asturies”. La inauguración de ‘N’el falar de la mio tierra. Vida y obra de Gabino Muñiz García-Robés (1884-1966)’ tuvo llugar ayeri con un actu nel que tuvo presente l’alcadesa Pilar Varela, ente otres autoridaes, y la sobrina nieta del escritor, Carmen Martín. La xente interesao en visitala va poder facelo hasta’l día 13, de llunes a vienres, n’horariu de 11 a 14 hores.

(d’Asturies.com, 04-03-2015)

Read Full Post »

Ana Cano defende’l teatru como una “ferramienta de primer orde pa normalizar l’asturianu”

PABLO R. GUARDADO

L’Academia de la Llingua Asturiana (ALLA) entregó esti vienres nel nuevu llar social de la institución los premios de los concursos del 2011. Nel actu, Ana María Cano destacó la importancia que tien el teatru na normalización del idioma.

La presidenta de l’ALLA fixo estes declaraciones tres la entrega del premiu del Concursu de Teatru a Noel Canto Toimil pola obra ‘El facedor de gomeros’, autor mozu que tamién defendió la importancia d’esti xéneru “que lleva a los teatros a xente de toles condiciones sociales y edaes”. “El teatru n’asturianu, a parte de tener una calidá lliteraria alta, ye una ferramienta de primer orde pa normalizar l’asturianu. N’Asturies hai munchos grupos de teatru que faen representaciones en llingua asturiana y qu’atraen a muncha xente, concienciada o non, que disfruta cola obra, aplaude, ri o llora”, destacó Cano. Sicasí, llamentó qu’esti puxu que tien el teatru n’asturianu nun vaya acompañáu por una política llingüística afayadiza.

Read Full Post »